''Khuda k wastay dakho na muskra kay mujhay'' A beautifull urdu ghazal by Bismil Azeem Abadi

نہ اپنے ضبط کو رسوا کرو ستا کے مجھے

خدا کے واسطے دیکھو نہ مُسکرا کے مجھے

سوائے داغ ملا کیا چمن میں آ کے مجھے

قفس نصیب ہو آشیاں بنا کے مجھے

ادب ہے میں جھکائے ہوئے آنکھ اپنی

غضب ہے تم جو نہ دیکھو نظر اٹھا کے مجھے

الہٰی کچھ تو ہو آساں نزع کی مشکل

دمِ اخیر تو تسکین دے وہ آ کے مجھے

خدا کی شان ہے میں جن کو دوست رکھتا تھا

وہ دیکھتے بھی نہیں اب نظر اُٹھا کے مجھے

مری قسم ہے تمہیں رہروان ملک عدم

خدا کے واسطے تم بھولنا نہ جا کے مجھے

ہمارا کون ٹھکانہ ہے ہم تو بسملؔ ؔ ہیں

نہ اپنے آپ کو رسوا کرو ستا کے مجھے

٭٭٭

بسملؔ عظیم آبادی 

chaman main phool khilaingay kisi bahanay say'' A beautifull urdu ghazal by Bismil Azeem Abadi

خزاں کے جانے سے ہو یا بَہار آنے سے

چمن میں پھول کھلیں گے کسی بہانے سے

وہ دیکھتا  رہے مُڑ مُڑ کے سوئے در کب تک

جو کروٹیں بھی بدلتا نہیں ٹھکانے سے

اُگل نہ سنگِ ملامت خدا سے ڈر ناصح

ملے گا کیا تجھے شیشوں کے ٹوٹ جانے سے

زمانہ آپ کا ہے اور آپ اس کے ہیں

لڑائی مول لیں ہم مُت کیوں زمانے سے

خدا کا شکر  سویرے سے ہی آ گیا قاصد

میں بچ گیا شبِ فرقت کے ناز اٹھانے سے

میں کچھ کہوں نہ کہوں کہہ رہی ہے خاکِ جبیں

کہ اس جبیں کو ہے نسبت اِک آستانے سے

قیامت آئے قیامت سے میں نہیں ڈرتا

اُٹھا تو دے کوئی پردہ کسی بہانے سے

خبر بھی ہے تجھے آئینہ دیکھنے والے

کہاں گیا ہے دو پٹّہ سرک کے شانے سے

یہ زندگی بھی کوئی زندگی ہوئی بسملؔ

نہ رو سکے نہ کبھی ہنس سکے ٹھکانے سے

بسملؔ عظیم آبادی 

mari dua ha k woh gair pa un ki nazar na ho woh hath utha rahain hain k ya rab asar na ho '' A beautifull urdu ghazal by Bismil Azeem Abadi

میری دُعا کہ غیر پہ اُن کی نظر نہ ہو

وہ ہاتھ اٹھا رہے ہیں کہ یارب اثر نہ ہو

ہم کو بھی ضد یہی ہے کہ تیری سحر نہ ہو

اے شب تجھے خدا کی قسم مختصر نہ ہو

تم اک طرف تمہاری خدائی ہے اک طرف

حیرت زدہ ہے دل کی کدھر ہو کدھر نہ ہو

دُشوار تر بھی سہل ہے ہمت کے سامنے

یہ ہو تو کوئی ایسی مُہم ہے کہ سر نہ ہو

جب وہ نہ آئے فاتحہ پڑھنے تو اے صَبا

باز آ گیا میں شمع بھی اب نوحہ گر نہ ہو

یہ کہہ کے دیتی جاتی ہے تسکیں شبِ فراق

وہ کون سی ہے رات کہ جس کی سحر نہ ہو

بسملؔ بتوں کا عشق مبارک تمہیں مگر

اِتنے نڈر نہ ہو کہ خدا کا بھی ڈر نہ ہو

٭٭٭

بسملؔ عظیم آبادی 

rukh pa gasuo jo bikhar jaingay hum andhray main kidhar jaingay ''A beautifull urdu ghazal by Bismil Azeem Abadi

رُخ پہ گیسو جو بکھر جائیں گے

ہم اَندھیرے میں کدھر جائیں گے

اپنے شانے پہ نہ زلفیں چھوڑو

دل کے شیرازے بکھر جائیں گے

یاد آیا نہ اگر وعدے پر

ہم تو بے مَوت کے مر جائیں گے

اپنے ہاتھوں سے پلا دے ساقی

رند اک گھونٹ میں تر جائیں گے

قافلے وقت کے رفتہ رفتہ

کسی منزل پہ ٹھہر جائیں گے

مُسکرانے کی ضرورت کیا ہے

مرنے والے یونہی مر جائیں گے

ہو نہ مایوس خدا سے بسملؔ

یہ بُرے دن بھی گذر جائیں گے

٭٭٭

بسملؔ عظیم آبادی 

chman ko lag gai kis ki nazar khuda janay '' A beautifull urdu ghazal by Bismil Azeem Abadi

چمن کو لگ گئی کس کی نظر خدا جانے

چمن رہا نہ رہے وہ چمن کے افسانے

سُنا نہیں ہمیں اُجڑے چمن کے افسانے

یہ رنگ ہو تو سنک جائیں کیوں نہ دیوانے

چھلک رہے ہیں صُراحی کے ساتھ پیمانے

بُلا رہا ہے حرم، ٹوکتے ہیں بُت خانے

کھسک بھی جائے گی بوتل تو پکڑے جائیں گے رند

جناب شیخ لگے آپ کیوں قسم کھانے

خزاں میں اہل نشیمن کا حال تو دیکھا

قفس نصیب پہ کیا گزری خدا جانے

ہجوم حشر میں اپنے گناہ گاروں کو

تیرے سوا کوئی ایسا نہیں جو پہچانے

نقاب رُخ سے نہ سرکی تھی کل تلک جن کی

سبھا میں آج وہ آئے ہیں ناچنے گانے

کسی کی مست خرامی سے شیخ نالا ہیں

قدم قدم پہ بنے جا رہے ہیں میخانے

یہ انقلاب نہیں ہے تو اور کیا بسملؔ

نظر بدلنے لگے اپنے جانے پہچانے

٭٭٭

بسملؔ عظیم آبادی 

ya but ab kay bohat sar utha kay baithay hain ''A beautifull urdu ghazal by Bismil Azeem Abadi

یہ بُت پھر اب کے بہت سر اٹھا کے بیٹھے ہیں

خدا کے بندوں کو اَ پنا بنا کے بیٹھے ہیں

ہمارے سامنے جب بھی وہ آ کے بیٹھے ہیں

تو مسکرا کے نگاہیں چُرا کے بیٹھے ہیں

کلیجہ ہو گیا زخمی فراق ِ جاناں میں

ہزاروں تیر ستم دل پہ کھا کے بیٹھے ہیں

تم ایک بار تو رُخ سے نقاب سرکا دو

ہزاروں طالبِ دیدار آ کے بیٹھے ہیں

اُبھر جو آتی ہے ہر بار موسمِ گل میں

اک ایسی چوٹ کلیجے میں کھا کے بیٹھے ہیں

یہ بُتکدہ ہے اِدھر آئیے ذرا بسملؔ

بتوں کی یاد میں بندے خدا کے بیٹھے ہیں

پسند آئے گی اب کس کی شکل بسملؔ کو

نظر میں آپ جو اس کی سما کے بیٹھے ہیں

٭٭٭

بسملؔ عظیم آبادی 

nigah e qahar hogi ya muhabbat ki nazar hogi ''A beautifull urdu ghazal by Bismil Azeem Abadi

نگاہِ قہر ہوگی یا محبت کی نظر ہوگی

مزہ دے جائے گی دل سے اگر اے سیم بَر ہوگی

تمہیں جلدی ہے کیا جانا ابھی تو رات باقی ہے

نہ گھبراؤ ذرا ٹھہرو کوئی دم میں سحر ہوگی

ابھی سے سارے عالم میں تو اک اندھیر برپا ہے

نہ جانے کیا غضب ڈھائے گی جب یہ تا کمر ہوگی

نہ لائے گی تو کیا بے چین بھی ان کو نہ کر دے گی

ہماری آہ کیا کمبخت اتنی بے اثر ہوگی

ہم اس کو دیکھ لیں گے اور وہ ہم کو نہ دیکھے گی

نگاہِ یار کیا محفل میں اتنی بے خبر ہوگی

چلا جاتا تو ہوں بہروپ بن کر ان کی محفل میں

کہوں گا کیا رسائی گر کہیں منہ دیکھ کر ہوگی

نگاہِ لطف سے دیکھا گا مجھ کو ایک جہاں تو کیا

اگر تم دیکھ لو گے میری قسمت عرش پر ہوگی

اسیری میں بھی یادِ گل کرے گی اس طرح بلبل

قفس کے در پہ سر ہوگا، سوئے گلشن نظر ہوگی

جو بے جُرمی پہ بھی بسملؔ کو تم نے کر دیا بسملؔ

بتاؤ گے بھلا کیا حشر میں پُرسش اگر ہوگی

بسملؔ عظیم آبادی 

jan par khail chukay jan say janay walay '' A beautifull urdu ghazal by Bismil Azeem Abadi

اب رہا کیا ہے جو اَب آئے ہیں آنے والے

جان پر کھیل چُکے جان سے جانے والے

یہ نہ سمجھے تھے کہ یہ دن بھی ہیں آنے والے

اُنگلیاں ہم پہ اٹھائیں گے اٹھانے والے

کون سمجھائے نہ اٹھلا کے سرِ رہ چلئے

ہیں یہ انداز گنہگار بنانے والے

پوچھنے تک کو نہ آیا کوئی اللہ اللہ

تھک گئے پاؤں کی زنجیر بجانے والے

کہیں رونا نہ پڑے تجھ کو زمانے کے ساتھ

ارے او وقت کی جھنکار پر گانے والے

آپ اندازِ نظر اپنا بدلتے ہی نہیں

اور بُرے بنتے ہیں بے چارے زمانے والے
پوچھتی ہے در و دیوار سے بیمار کی آنکھ

اب کہاں ہیں وہ مرے ناز اٹھانے والے

بخدا بھول گئے اپنی مصیبت بسملؔ

یاد جب آئے محمدؐ کے گھرانے والے

٭٭٭

بسملؔ عظیم آبادی 

neend Aati ha na woh Aatay hain rat guzri hi chali jati ha ''A beautifull urdu ghazal by Bismil Azeem Abadi

ساری امید رہی جاتی ہے

ہائے پھر صبح ہوئی جاتی ہے

نیند آتی ہے نہ وہ آتے ہیں

رات گذری ہی چلی جاتی ہے

مجمع حشر میں رودادِ شباب

وہ سنے بھی تو کہی جاتی ہے

داستاں پوری نہ ہونے پائی

زندگی ختم ہوئی جاتی ہے

وہ نہ آئے ہیں تو بے چین ہے روح

ابھی آتی ہے ابھی جاتی ہے

زندگی آپ کے دیوانے کی

کسی صورت سے کٹی جاتی ہے

غم  میں پروانوں کے اک مدت سے

شمع گھلتی ہے چلی جاتی ہے

آپ محفل سے چلے جاتے ہیں

داستاں باقی رہی جاتی ہے

ہم تو بسملؔ ہی رہے خیر ہوئی

عشق میں جان چلی جاتی ہے

بسملؔ عظیم آبادی 

ab mulaqat kahan shishay say pemany say fatiha parh k chalay Aatay hain makhany say '' A beautifull urdu ghazal by Bismil Azeem Abadi

  

اب ملاقات کہاں شیشے سے پیمانے سے

فاتحہ پڑھ کے چلے آتے ہیں میخانے سے

کیا کریں جام و سبو ہاتھ پکڑ لیتے ہیں

جی تو کہتا ہے کہ اُٹھ جائیے میخانے سے

پھونک کر ہم نے ہر اک گام پہ رکھا ہے قدم

آسماں پھر بھی نہ باز آیا ستم ڈھانے سے

ہم کو جب آپ بلاتے ہیں چلے آتے ہیں

آپ بھی تو کبھی آ جائیے بلوانے سے

ارے او وعدہ فراموش پہاڑ ایسی رات

کیا کہیں کیسے کٹی تیرے نہیں آنے سے

یاد رکھ! وقت کے انداز نہیں بدلیں گے

ارے اللہ کے بندے ترے گھبرانے سے

سر چڑھائیں کبھی آنکھوں سے لگائیں ساقی

تیرے ہاتھوں کی چھلک جائے جو پیمانے سے

خالی رکھی ہوئی بوتل  یہ پتا دیتی ہے

کہ ابھی اُٹھ کے گیا ہے کوئی میخانے سے

آئے گی حشر کی ناصح کی سمجھ میں کیا خاک

جب سمجھ دار سمجھتے نہیں سمجھانے سے

برق کے ڈر سے کلیجے سے لگائے ہوئے ہے

چار تِنکے جو اُٹھا لائی ہے ویرانے سے

دل ذرا بھی نہ پسیجا بُتِ کافر تیرا

کعبہ اللہ کا گھر بن گیا بُت خانے سے

شمع بیچاری جو اک مونس تنہائی تھی

بجھ گئی وہ بھی سرِ شام ہوا آنے سے

غیر کا ہے کو سنیں گے ترا دکھڑا بسملؔ

ان کو فرصت کہا ں ہے اپنی غزل گانے سے

٭٭٭

بسملؔ عظیم آبادی 

khazaan jub tak chali jati nahi ha ' chaman waloon ko neend Aati nahi ha '' A beautifull urdu ghazal by Bismil Azeem Abadi

 خزاں جب تک چلی جاتی نہیں ہے

چمن والوں کو نیند آتی نہیں ہے

جفا جب تک کہ چونکاتی نہیں ہے

محبت ہوش میں آتی نہیں ہے

جو روتا ہوں تو ہنستا ہے زمانہ

جو سوتا ہوں تو نیند آتی نہیں ہے

تمہاری یاد کو اللہ رکھے

جب آتی ہے تو پھر جاتی نہیں ہے

کلی بلبل سے شوخی کر رہی ہے

ذرا پھولوں سے شرماتی نہیں ہے

جہاں میکش بھی جائیں ڈرتے ڈرتے

وہاں واعظ کو شرم آتی نہیں ہے

نہیں ملتی تو ہنگامے ہیں کیا کیا

جو ملتی ہے تو پی جاتی نہیں ہے

جوانی کی کہانی داورِ حشر

سرِ محفل کہی جاتی نہیں ہے

کہاں تک شیخ کو سمجھائیے گا

بُری عادت کبھی جاتی نہیں ہے

گھڑی بھر کو جو بہلائے مرا دل

کوئی ایسی گھڑی آتی نہیں ہے

ہنسی بسملؔ کی حالت پر کسی کو

کبھی آتی تھی اب آتی نہیں ہے

٭٭٭

بسملؔ عظیم آبادی