اب آسمان کے آگے نہ ہاتھ پھیلانا
زمیں کے حسن کی خود پاسبان ہے مٹی
کہیں گلاب سے چہروں کو روند ڈالا ہے
کہیں پہ ماں کی طرح مہربان ہے مٹی
کوئی بھی آئے سکندر ہو یا قلندر ہو
ہر اک کے واسطے جائے امان ہے مٹی
زمانہ چھین سکا ہے نہ اس کی شادابی
اُسی طرح سے ابھی تک جوان ہے مٹی
کوئی بھی آ کے یہاں سے کہیں نہیں جاتا
عجیب جادو بھری داستان ہے مٹی
نکل کے اس سے میں باہر قدم نہ رکھّوں
گا
مری زمین میرا آسمان ہے مٹی
خموش ہو گئے وہ ساز وہ جلال و جمال
اب اُن دنوں کی فقط ترجمان ہے مٹی
جو آسمان سے نیچے قدم نہ رکھتے تھے
اب اُن ستاروں کا نام و نشان ہے مٹی
قدم قدم پہ یہاں بستیاں ہیں پھولوں کی
حسین لوگوں کی اک ایسی کان ہے مٹی
کسی کے دور کے جلوؤں سے مجھ کو کیا
لینا
مرا یقین ہے مرا گمان ہے مٹی
یہ گفتگو کا سلیقہ مجھے اسی سے ملا
دُکھی دلوں کی ازل سے زبان ہے مٹی
کھلا ہوا ہے ہر اک کے لئے یہ دروازہ
ہو میہمان کوئی میزبان ہے مٹی
No comments:
Post a Comment