Tumhare Liya Dil Mian Ab Bhi Jagha hai Tumhain kia Pata Hai Tumhain kia Khabar '' A Beautiful Urdu poetry by Ahmed Fawad

تمہارے لئے دل میں اب بھی جگہ ہے تمہیں کیا پتہ ہے تمہیں کیا خبر

ابھی مجھ پہ طاری وہی اک نشہ ہے تمہیں کیا پتہ ہے تمہیں کیا خبر

تمہیں قہقہوں کی کہانی سے مطلب ہے ہنستے رہو گے

کہاں آنسوؤں کا چلا قافلہ ہے تمہیں کیا پتہ ہے تمہیں کیا خبر

کوئی آسماں پر ستاروں کی شمعیں لئے منتظر ہے

اکیلا نہ جانے وہ کب سے کھڑا ہے تمہیں کیا پتہ ہے تمہیں کیا خبر

ہر اک سانس میری شرابور آتی ہے خوشبو میں تیری

یہ کیسی جدائی یہ کیا فاصلہ ہے تمہیں کیا پتہ ہے تمہیں کیا خبر

زمیں آسماں جیل خانہ ہے تیرا میں سب جانتا ہوں

یہ جینا نہیں ہے فقط اک سزا ہے تمہیں کیا پتہ ہے تمہیں کیا خبر

اذیت کے صحرا میں جل کر بھسم ہو گئی روح میری

کوئی شعر جب مجھ پہ نازل ہوا ہے تمہیں کیا پتہ ہے تمہیں کیا خبر

یہ سورج یہ سب چاند تارے پہنچ کے وہاں کھو گئے ہیں

مرے دل میں اتنا بڑا اک خلا ہے تمہیں کیا پتہ ہے تمہیں کیا خبر

کہاں جائیں کس سے شکستہ دلی کو دلاسہ ملے گا

کہ دشمن یہاں ساری آب و ہوا ہے تمہیں کیا پتہ ہے تمہیں کیا خبر

زمانہ کے پہلو میں چلتے ہوئے تم نے دیکھا نہیں اس طرف

ابھی تک مرے دل میں اسکا گلہ ہے تمہیں کیا پتہ ہے تمہیں کیا خبر

احمد فواد