Is Shahar Main Ha Husan Ka Dastor Nirala '' A Beautiful Urdu poetry by Ahmed Fawad

بھولے سے بھی آئے نہ کوئی چاہنے والا

اس شہر میں ہے حسن کا دستور نرالا

اک رات کی دہشت کا ٹھکانہ ہے مرا دل

تم ڈھونڈنے آئے ہو کہاں دن کا اجالا

میرا تو چلو ٹھیک ہے مجرم ہوں تمہارا

ان چاند ستاروں کو یہاں کس نے اچھالا

اس طرح سے ٹوٹیں گے اگر روز یہاں دل

نکلے گا بہت جلد محبت کا دِوالہ

کرتے ہیں بہت آپ حسینوں کی وکالت

اے کاش! پڑے ان سے کبھی آپ کو پالا

بس دل پہ حکومت کا طریقہ اسے آئے

محبوب حقیقت میں نہ گورا ہے نہ کالا

ممکن ہی نہ تھی اور ترے ناز کی تردید

میں نے تو بہت چاہا بہت دل کو سنبھالا

نظموں سے تو کھنچتی نہیں اس حسن کی تصویر

لکھوں گا اب اس پر کوئی پُر زور مقالہ

یہ سبزۂ خط حسن کی تنسیخ نہیں ہے

دیکھا نہیں کیا تم نے کبھی چاند کا ہالہ

اس طرح سے رو رو کے نہ کر عشق کی تذلیل

اب جا کے کسی روز اسے گھر سے اٹھا لا

دل اٹھ کے ہر اک پیاس کی تردید کرے گا

آئے گا جہاں بھی ترے ہونٹوں کا حوالہ

اب لوٹ کے آنا وہاں اچھا نہیں لگتا

جس گھر سے مجھے تو نے ہے اس طرح نکالا

لگتا ہے یہ دل اب بھی تجھے بھولا نہیں ہے

نکلا ہے تری یاد میں اک اور رسالہ

پھر اٹھ کے یہاں سے وہ کہیں جا نہیں سکتا

اک بار جو ہونٹوں سے لگا لے یہ پیالہ

اس طرح گنوا ڈالو گے ہر ایک کی توقیر

ہر ایک کی خدمت میں نہ آداب بجا لا

احمد فواد