Masiha Urdu ghazal by Ahmad faraz مسیحا میری افسردگی سے پریشاں نہ ہو تو مری تلخیوں کا سبب تو نہیں

مسیحا

میری افسردگی سے پریشاں نہ ہو

تو مری تلخیوں کا سبب تو نہیں

تیری آنکھیں تو میری ہی دمساز ہیں

تھیں کبھی اجنبی لیکن اب تو نہیں

تجھ کو میری مسرّت مقدّم سہی

تیرا غم مجھ کو وجہِ طرب تو نہیں

تیرا احسان ہے تُو نے میرے لئے

اپنی پلکوں سے راہوں کے کانٹے چُنے

خود کڑی دھُوپ میں رہ کے میرے لئے

تُو نے زلفوں کے شاداب سائے بُنے

میری خاطر زمانے کو پاگل کہا

میری خاطر زمانے کے طعنے سُنے

تُو مری زندگی ہے مگر جانِ من!

میرے دل میں کئی گھاؤ ایسے بھی ہیں

جن کا درماں تری دسترس میں نہیں

ایک غم جس کی شدّت ہمہ گیر ہے

تیرے بس میں نہیں میرے بس میں نہیں

   احمد فراز