Tashnagi Urdu ghazal by Ahmad faraz تشنگی دیکھو پگھلا پگھلا سونا بہہ نِکلا کہساروں سے دیکھو نازک نازک کرنیں ٹوٹ رہی ٹیلوں پر

تشنگی

دیکھو پگھلا پگھلا سونا بہہ نِکلا کہساروں سے

دیکھو نازک نازک کرنیں ٹوٹ رہی ٹیلوں پر

دیکھو بھینی بھینی خوشبو آتی ہے گلزاروں سے

دیکھو نیلے نیلے بادل جھُول رہے جھیلوں پر

تم بھی سُندر سُندر سپنوں کی لہروں پر بہہ جاؤ

اور ذرا کچھ لمحے ٹھہرو اور ذرا رہ جاؤ

سُلگا سُلگا موسم ہے شعلوں کی دہکتی حِدّت سے

چڑھتے سورج کے سائے میں ساری دنیا جلتی ہے

دہک دہک اُٹھی ہیں سڑکیں تپتی دھوپ کی شدّت سے

ابھی نہ جاؤ دیکھو کتنی تیزی سے لُو چلتی ہے

اِس کو بھی اِک جبرِ مشیّت سمجھو اور سہہ جاؤ

اور ذرا کچھ لمحے ٹھہرو اور ذرا رہ جاؤ

دیکھو چار  طرف ٹھنڈے ٹھنڈے سائے لہراتے ہیں

تارے نکھرے موتی بکھرے شام کا جادو قائم ہے

خنک خنک پھولوں کے جھونکے خوشبوئیں برساتے ہیں

ٹھیک ہے تم کو جانا ہے پر ایسا بھی کیا لازم ہے

ٹھہرو کچھ باتیں ہم سے سُن لو کچھ تم کہہ جاؤ

اور ذرا کچھ لمحے ٹھہرو اور ذرا رہ جاؤ

   احمد فراز