Aik Piyari Nazam

سنا ہے حد نظر سے آگے  زندگی اب بھی مسکراتی ہے وہاں صبحیں بڑی توانا ہیں اور سب دن بھی خوب دانا ہیں اب بھی فکریں گلی محلے کی  باتوں باتوں میں ختم ہوتی ہیں اب بھی موسم وہاں نشیلے ہیں وہی قوس قزح کے جھولے ہیں سچ بھی جذبوں کی روح میں ہے شامل  نہ محبت یہ آزماتی ہے خوشبویں مٹیوں میں زندہ ہیں عکس بھی پانیوں میں ہیں باقی اور اک دور کھڑے سائے کو  اپنی سب دھڑکنیں سناتی ہیں چلو اب ہم بھی وہیں چلتے ہیں جہاں دل آج بھی دھڑکتے ہیں

اب بھی سورج کی وہی عادت ہے گھر کے آنگن کو وہ جگاتا ہے منہ اندھیرے سفر کو جاتے ہیں  روز پھر گھر میں شام ہوتی ہے وہی بچوں کا ہے حسیں بچپن جگنو, تتلی کی ہے وہی ان بن وہی بارش کی مستیاں اب بھی  ٹین کی چھت پہ گنگناتی ہیں اب بھی باقی ہے دوستی کا مان اب بھی رشتوں میں جان باقی ہے اب بھی تاروں کے سنگ راتوں کو  چاندنی محفلیں سجاتی ہے اب بھی سب قافلے جشن میں ہیں  اب بھی سب فاصلے امن میں ہیں  جہاں اب بھی وہ وقت ساکن ہے  زندگی اب بھی مسکراتی ہے

مرمریں شوخ سی حسین کرنیں  چہروں کو چوم کر اٹھاتی ہیں وہی برگد تلے کی ہیں شامیں ایک حقہ ھے کئی ہیں سامع وہی جھریوں سی پیاری نانی ہے  وہی پریوں کى اک کہانی ہے ہے سخن باکمال لوگوں کا میٹھا پن لازوال لہجوں کا اب بھی جنت ہے ماں کے قدموں میں  اب بھی ماں لوریاں سناتی ہے اب بھی راتوں کو چاند کی سکھیاں اپنے چندا سے ملنے جاتی ہیں  مسافر جا کے لوٹ آتے ہیں  ان کی یادیں نہیں ستاتی ہیں سنا ہے حد نظر سے آگے  زندگی اب بھی مسکراتی ہے