Aqedat " Woh Saro Batain Woh Saray Qissay" A Beautifu; Urdu Poem By Ahmed Faraz

 عقیدت

میں وارفتگی سے اس کو سنا رہا تھا

وہ ساری باتیں وہ سارے قصے

جو اس سے ملنے سے پیشتر

میری زندگی کی حکایتیں تھیں

میں کہہ رہا تھا کہ اور بھی لوگ تھے

جنھیں میری آرزو تھی میری طلب تھی

کہ جن سے میری محبتوں کا رہا تعلق

کہ جن کی مجھہ پر عنایتیں تھیں

میں کہہ رہا تھا کہ ان میں کچھہ کو

تو میں نے جاں سے عزیز جانا

مگر انہیں میں سے بعض کو میری بے دلی سے شکایتیں تھیں

میں ایک اک بات ، ایک اک جرم کی کہانی

دھڑکتے دل کانپتے بدن سے سنا رہا تھا

مگر وہ

پتھر بنی مجھے اس طرح سے سنتی رہی کہ جیسے میرے لبوں پر

"کسی مقدس ترین صحیفے کی آیتیں تھیں "

احمد فراز