"Buzurgoon Ki Duain Mil Rahi Hain" A Beautiful Urdu Ghazal By saghar Siddiqui

بزرگوں کی دعائیں مل رہی ہیں

محبت کو سزائیں مل رہی ہیں

فروزاں ہیں تمہارے غم کے دیپک

بڑی روشن فضائیں مل رہی ہیں

حسین گیسو ہیں شانوں پر پریشاں

گلے ان سے گھٹائیں مل رہی ہیں

شعور_ بزم تک جن کو نہیں ہے

انہیں رنگیں ادائیں مل رہی ہیں

ترا آنچل ہوا میں اڑ رہا ہے

ترانوں کو نوائیں مل رہی ہیں

چلو بادہ کشوں میں تیرہ بختو

ستاروں کو ضیائیں مل رہی ہیں

وفاوں کا صلہ ساغر"" وطن میں

بہت ارزاں جفائیں مل رہی ہیں