"Shaoor o Fikar o Nazar Say Khitab Karta Hun" A Beautiful Urdu Ghazal By saghar Siddiqui

چمن سے ۔ برق و شرر سے خطاب کرتا ہوں

شعور و فکر و نظر سے ۔۔۔۔ خطاب کرتا ہوں

قدم قدم پہ ۔۔۔۔۔۔ کھلاتا ہوں گل معانی کے

جہانِ شمس و قمر سے ۔۔۔ خطاب کرتا ہوں

جبیں پہ ۔۔۔۔۔۔ سطوتِ الہام کے تقاضے ہیں

زبانِ قلب و جگر سے ۔۔۔۔۔۔ خطاب کرتا ہوں

میں ایک مردِ قلندر ۔۔۔۔۔۔۔۔ میں ایک دیوانہ

طلوعِ نورِ سحر سے ۔۔۔۔۔۔۔ خطاب کرتا ہوں

مزاجِ شبنم و لالہ سے ۔۔۔۔۔۔۔۔ بات ہے میری

نگاہِ شعلہ نگر سے ۔۔۔۔۔۔۔۔۔ خطاب کرتا ہوں

نہ کارواں سے شکایت ۔ نہ رہنما سے کلام

غُبارِ راہ گزر سے ۔۔۔۔۔۔۔۔۔۔۔ خطاب کرتا ہوں

ہر ایک گام پہ ہیں ۔ پتھروں کی دیواریں

سکوتِ اہلِ ہنر سے ۔۔۔۔۔۔۔ خطاب کرتا ہوں

بنامِ عظمتِ یزداں ۔۔۔۔۔ کبھی کبھی ساغرؔ

وقارِ حسنِ بشر سے ۔۔۔۔۔۔ خطاب کرتا ہوں

ساغرؔ صدیقی