"Hans Nahi Sakte Shagoofe Say Ruth Kar"A Beautiful Urdu Poetry By saghar Siddiqui

ہنس نہیں سکتے شگوفے تازگی سے روٹھ کر

ہم زمانے میں جئے ہیں زندگی سے روٹھ کر

زلف جاناں سے ملی فکر و نظر کی چاندنی

ظلمتیں ہم نے نکھاریں روشنی سے روٹھ کر

خود منانے کے لیے آئے مجھے دیر و حرم

سجدہ الہام پایا بندگی سے روٹھ کر

غم سے رونق ہو گئ کاشانۂ تقدیر میں

مطمئن ہے دل کی دنیا ہر خوشی سے روٹھ کر

ایک دن ساقی یہی ٹوٹے ہوئے جام و سبو

مے کدے ترتیب دیں گے تشنگی سے روٹھ کر

سوچتے ہیں حسرتوں کے موڑ پر شام و سحر

جائیں گے ساغر کہاں ان کی گلی سے روٹھ کر