Mujh sa phir wo juda ho raha ha .'' A Beautiful Urdu Poetry By Ahmed Fawad,

مجھ سے پھر وہ جدا ہو رہا ہے

اے زمانے یہ کیا ہو رہا ہے

زندگی اب تِرا کیا بنے گا

لمحہ لمحہ فنا ہو رہا ہے

کیسی پاگل ہوا چل پڑی ہے

ہر کوئی مبتلا ہو رہا ہے

پہلے ہوتا ہو شاید روا بھی

اب تو سب ناروا ہو رہا ہے

کچھ خبر بھی ہے تجھ کو خدایا

تیری دنیا میں کیا ہو رہا ہے

آگ کیسی لگی پانیوں میں

کیوں سمندر ہوا ہو رہا ہے

کیوں زمانہ ہے یہ گردشوں میں

اس میں کس کا بھلا ہو رہا ہے

وہ جو کرتے تھے سب سے چھپا کے

اب وہ سب برملا ہو رہا ہے

احمد فواد

Phir us ka bad yah dunya jala da '' A Beautiful Urdu Poetry By Ahmed Fawad,

فقط اک بار وہ صورت دکھا دے

پھر اُس کے بعد یہ دنیا جلا دے

اگر رکھی ہے دل میں آگ اتنی

کہیں سے چند آنسو بھی دِلا دے

           

نہیں ہے گر کوئی جینے کی صورت

تو مرنے کا ہی تھوڑا حوصلہ دے

تری دنیا میں اب لگتا نہیں دل

اٹھا دے اب مجھے یاں سے اٹھا دے

 احمد فواد

Ma kin chasmun sa in ka hal punchun '' A Beautiful Urdu Poetry By Ahmed Fawad,

میں کن چشموں سے ان کا حال پوچھوں

وہ دریا جو زمیں میں کھو گئے ہیں

تمہیں اب کون آئے گا منانے

مری آنکھوں کے نغمے سو گئے ہیں

کہوں کیا کیسے کیسے ہنستے چہرے

مرے سینہ میں آنسو بو گئے ہیں

نہ راس آئی انہیں پھر کوئی محفل

تری محفل سے اٹھ کر جو گئے ہیں

خوشا یہ آنسوؤں کے تازہ چشمے

دلوں کے زخم سارے دھو گئے ہیں

تمہارا ہاتھ کیا ہاتھوں میں آیا

وہ سارے خواب پورے ہو گئے ہیں

احمد فواد

Koi gham yah khusi nahi hogi '' A Beautiful Urdu Poetry By Ahmed Fawad,

کوئی غم یا خوشی نہیں ہو گی

اب یہاں زندگی نہیں ہو گی

وہ جو اس دل میں امڈی رہتی تھی

وہ خوشی اب کبھی نہیں ہو گی

ہر طرف ایسی دھوپ پھیلی ہے

جیسے اب رات ہی نہیں ہو گی

تم کسی اور کو تلاش کرو

مجھ سے یہ دل لگی نہیں ہو گی

چاند تارے سب اپنے گھر جائیں

ان سے اب روشنی نہیں ہو گی

تیرا غم جب تلک سلامت ہے

آنسوؤں میں کمی نہیں ہو گی

اب تو روٹھے ہیں اس طرح گویا

اب کبھی بات ہی نہیں ہو گی

احمد فواد

Jo behi mil jay us sa pyar karo '' A Beautiful Urdu Poetry By Ahmed Fawad,

اور اُس کا نہ انتظار کرو

جو بھی مل جائے اُس سے پیار کرو

چاند کے ساتھ شب میں سویا تھا

آؤ سب مجھ کو سنگسار کرو

صرف دامن کا چاک کیا معنی

سب لباس اپنا تار تار کرو

عشق سودا ہے صرف گھاٹے کا

اب کوئی اور کاروبار کرو

جس پہ رکھّا نہ ہو کسی نے قدم

راستہ ایسا اختیار کرو

تم بھی جھوٹے ہو وہ بھی جھوٹا ہے

اب کسی کا نہ اعتبار کرو

چاک دامن یہاں ہزاروں ہیں

تم سے جو بھی کہے بہار کرو

احمد فواد

Bujh gay tari rah taktay huay '' A Beautiful Urdu Poetry By Ahmed Fawad,

بجھ گئے تیری راہ تکتے ہوئے

آنسوؤں کے کئی ہزار دیئے

وہ جو معصوم بھولا بھالا ہے

اُس نے اس دل پہ کتنے ظلم کئے

خواب میں بھی وہ لڑکھڑاتا ہے

تیری آنکھوں سے جو شراب پئے

ہو گئے پیشہ ور رفوگر ہم

زندگانی میں اتنے زخم سیئے

تجھ سے ملنے کی کوئی آس نہیں

ہے یہی زندگی تو کون جیئے

یوں تو لاکھوں حسین صورت ہیں

دل دھڑکتا  ہے صرف تیرے لئے

احمد فواد

Jo Kabhi kah saka na kahnay de '' A Beautiful Urdu Poetry By Ahmed Fawad

جو کبھی کہہ سکا نہ کہنے دے

آج لفظوں سے خون بہنے دے

اب کوئی اور بات کر مجھ سے

یہ فراق و وصال رہنے دے

         

ایک ہی جیسے رات دن کب تک

کوئی تازہ عذاب سہنے دے

جن کی خوشبو نہ وقت چھین سکے

ایسے کلیوں کے مجھ کو گہنے دے

احمد فواد

Lamha Lamha ki Ankh pur nam ha '' A Beautiful Urdu Poetry By Ahmed Fawad,

لمحہ لمحہ کی آنکھ پُر نم ہے

کون کہتا ہے وقت مرہم ہے

موت کے منہ کو خوں لگا ایسا

ہر طرف زندگی کا ماتم ہے

میرا ہر لفظ گونگا بہرا ہے

اس کی ہر اک نگاہ مبہم ہے

پھر کوئی حادثہ ہوا ہو گا

دل کی آواز کتنی مدّھم ہے

شوق کا آج امتحاں ہو گا

دیکھیں کتنا نگاہ میں دم ہے

ٹھیک ہے داستانِ یوسف بھی

میرا محبوب کیا کوئی کم ہے

اس زمیں آسماں کی خیر نہیں

آج اُس کا مزاج برہم ہے

سب دئیے اُس کے سامنے گُل ہیں

کون شعلہ ہے کون شبنم ہے

احمد فواد

Us pr is ka asr to kiay ho ga '' A Beautiful Urdu Poetry By Ahmed Fawad,

 اُس پر اس کا اثر تو کیا ہو گا

دیکھ کر اور خوش ہُوا ہو گا

      کیسے اس بات کا یقیں آئے

تو بھی اس خاک سے بنا ہو گا

جو بھی ملتا ہے پوچھ لیتا ہوں

سوچتا ہوں اسے پتا ہو گا

صرف ہم جان سے ہی جائیں گے

تیرے جانے سے اور کیا ہو گا

راستہ میں کہیں کھڑا ہو گا

پھر خلاؤں میں تک رہا ہو گا

رہگزاروں میں آج بھی تنہا

کوئی دیوانہ گھومتا ہو گا

احمد فواد

Kes nay is tarha mary dil ki tarha dali ha '' A Beautiful Urdu Poetry By Ahmed Fawad,

کس نے اس طرح مرے دل کی طرح ڈالی ہے

پہلے دن سے یہ کرایہ کے لئے خالی ہے

اس تغافل سے تو لگتا ہے کہ اب اپنے لئے

کائنات اُس نے کوئی اور بنا ڈالی ہے

تیرے آنے کی تو صورت ہے نہ امید کوئی

بھیج دے کوئی کرن رات بہت کالی ہے

تم تو پاگل ہو چلو جاؤ کہیں اور مرو

نام لینا بھی محبت کا یہاں گالی ہے

آپ مجرم ہیں نہیں اس میں کسی کا بھی قصور

ہم نے خود جان کے یہ دل کی بلا پالی ہے

تجھ کو دیکھے گا نہ سوچے گا نہ اب چاہے گا

آج اِس دل نے کوئی ایسی قسم کھا لی ہے

جانے کیا سوچ کے اس پیڑ کو اپنایا تھا

پھول ہیں اس میں نہ پتّے نہ کوئی ڈالی ہے

دل کو ہم سارے زمانہ سے جدا جانتے تھے

اب کھلا ہے کہ یہی سب سے بڑا جعلی ہے

احمد فواد

Bujh gay han jo deay jalta tha un galiun ma '' A Beautiful Urdu Poetry By Ahmed Fawad,

بجھ گئے ہیں جو دئے جلتے تھے اُن گالوں میں

اب کوئی بھی نہیں آئے گا تری چالوں میں

ایک ہی پَل میں وہ کس طرح زمیں بوس ہوئی

وہ عمارت جو بنائی تھی کئی سالوں میں

کل تو تقدیر ترے ساتھ پھرا کرتی تھی

آج پوچھے گا تجھے کون بُرے حالوں میں

وقت جس نے انہیں بچپن میں لگایا تھا خضاب

کرنے آیا ہے سفیدی بھی ترے بالوں میں

نکتہ سنجی نہیں آواز کی لے دیکھتے ہیں

شاعری آ کے کہاں پھنس گئی قوّالوں میں

اپنے ہونے پہ ندامت کا وہ احساس رہا

کٹ گئی عمر جلوسوں میں کچھ ہڑتالوں میں

احمد فواد

Dil Ka Darwzay pa '' A Beautiful Urdu Poetry By Ahmed Fawad,

دل کے دروازہ پہ

دل کے دروازہ پہ اک نظم نے دستک دی ہے

اِن دو آنکھوں کو سمندر کے کنارے لکھ دے

گہری جھیلوں میں ستاروں کے دئے جلتے ہیں

دھوپ نے سبز درختوں کے وطن لوٹ لئے

دل کے دروازہ پہ اک نظم نے دستک دی ہے

دونوں ہاتھوں میں نئے سرخ گلاب

چودھویں رات کا مہتاب لئے

دل کے دروازہ پہ اک نظم نے دستک دی ہے

جیسے آفاق کے رخسار دھک اٹھتے ہیں

جیسے صحراؤں میں گلزار مہک اٹھتے ہیں

جیسے نغموں کو کوئی باندھ کے لے جاتا ہے

جیسے دریا کسی ویرانے میں کھو جاتے ہیں

دل کے دروازہ پہ اک نظم نے دستک دی ہے

آنسوؤں میں نئے آلام کے پیوند لگے

اس نئے درد کا درمان بھی مل جائے گا

تتلیاں کس کے تصور میں یوں دیوانی بنی پھرتی ہیں

خاک کے سینہ میں رنگوں کے کئی قریے ہیں

سبز پتوں کو خزاں سے نہیں ملنے دینا

دل کے دروازہ پہ

احمد فواد 

In do Ankhun ma '' A Beautiful Urdu Poetry By Ahmed Fawad,

ان دو آنکھوں ۔ ۔ ۔

ان دو آنکھوں میں بہت دور کہیں

گزرے موہوم زمانوں کی خموشی پہنے

ایک محجوب خوشی رہتی ہے

صاف شفّاف فضاؤں میں

نگاہوں کی حدوں سے آگے

خواب آوارہ پرندوں کی طرح

دھیمے لہجہ میں

کسی گیت کا بازو تھامے

پھر میرے دل کی طرف آتے ہیں

ان دو آنکھوں سے کوئی جا کے کہے

آسمانوں سے زمیں پر آئیں

کوئی تارہ کوئی بادل کوئی نغمہ لے کر

کوئی دریا کوئی چشمہ کوئی جھونکا لے کر

                                                                        احمد فواد

Taza Sena ma Muhabat '' A Beautiful Urdu Poetry By Ahmed Fawad,

تازہ سینہ میں ۔ ۔ ۔

تازہ سینہ میں محبت کا فسوں جاگا ہے

خواب زاروں سے ستاروں کے سفینے اترے

گھنٹیاں ننگے قدم، خاک بسر، جانے کہاں جاتی ہیں

اس نئے دکھ کے لئے کوئی نئی دنیا ہو

ہوں نئے پیڑ نیا چاند نیا سورج ہو

ہوں نئے حرف نئے لفظ نئی نظمیں ہوں

چاندنی رات کا ملبوس نہ یوں میلا ہو

دھوپ کے لہجہ میں نرمی ہو شرافت ہو

محبت کی سی شیرینی ہو

دو نئے ہاتھ نئے ہونٹ نئی آنکھیں ہوں

ہو نیا ذہن نئی روح نئی صورت ہو

اک نیا دل ہو

جو پاگل ہو

محبت کے لئے خود کو جلا سکتا ہو

جس میں صحراؤں کی وسعت ہو

سمندر کی سی گہرائی ہو

جس میں خاموشی ہو

ہیبت ہو پریشانی ہو

خاک میں رفعت افلاک ملا سکتا ہو

نیند سے مردہ پہاڑوں کو اٹھا سکتا ہو

احمد فواد

ghora gali ma aik sham '' A Beautiful Urdu Poetry By Ahmed Fawad,

گھوڑا گلی میں ایک شام

جب دھوپ مر رہی تھی

شام آہیں بھر رہی تھی

گزرے ہوئے دنوں کے چہرے بجھے ہوئے تھے

آنکھیں دھواں دھواں تھیں

غنچے جلے ہوئے تھے

دور آسماں کے دل میں خنجر گڑے ہوئے تھے

ہر دن چلا گیا تھا ہر رات سو گئی تھی

ایسے میں تم نے آ کر اس دل کو گدگدایا

انجان مسرتوں نے دروازہ کھٹکھٹایا

برسوں کی وحشتوں کو اک دم قرار آیا

دیکھا تجھے تو ہر سو پھر سے بہار آئی

چہرہ تو جانتا ہوں کیا نام بھی وہی ہے

آنکھوں کو میرے دل سے کیا کام بھی وہی ہے

اے اجنبی شناسا

برسوں سے پھر رہا تھا میں اس طرح سے پیاسا

اے پہلی مسکراہٹ

تھوڑا سا دے دلاسہ

دے دے مجھے اجازت خود میں تجھے ملا لوں

اس بند کارخانے کا کام پھر چلا لوں

احمد فواد

Aafaq Ka Kinare '' A Beautiful Urdu Poetry By Ahmed Fawad,

پانیوں کو جانے کیوں

پانیوں کو جانے کیوں

اس طرح کی جلدی ہے

یہ زمیں کے چہرہ پر

کس نے خاک مَل دی ہے

آفاق کے کنارے  

سورج کے بہتے خوں سے گلنار ہو گئے ہیں

وہ دھوپ کی صراحی ٹوٹی ہوئی پڑی ہے

پھر شام کی سیاہی دہلیز پر کھڑی ہے

کیا رات ہو گئی ہے

ڈرتے تھے جس سے سارے

وہ بات ہو گئی ہے

مہجور وادیوں میں

متروک راستوں پر

گمنام جنگلوں میں

روتی ہوئی شعاعیں اک خواب بُن رہی ہیں

ظلمت کی داستاں کا اک باب سن رہی ہیں

تیری تلاش میں پھر نکلیں گے چاند تارے

مجھ سے نہ جانے کتنے پھرتے ہیں مارے مارے

احمد فواد

Tujh Tak aanay ka liya hai ya nishani kafi '' A Beautiful Urdu Poetry By Ahmed Fawad,

تجھ تک آنے کے لئے ہے یہ نشانی کافی

مسکراتے ہوئے اک شاخ پہ دو رنگ کے پھول

دیکھو یہ جوش نمو کیسی قیامت شے ہے

لب آہن پہ کھلا دیتی ہے یوں زنگ کے پھول

کوئی موسم ہو انہیں اس سے سروکار نہیں

ہنستے رہتے ہیں ہر اک حال میں یہ سنگ کے پھول

آئینہ دیکھ کے یوں ناز سے شرماؤ نہیں

دیکھنا اور بھی ہوں گے کہیں اس ڈھنگ کے پھول

چاہنے والوں کی یہ فوج بکھر جائے گی

خواب ہو جائیں گے اک روز یہ اورنگ کے پھول

صرف عارض کے گلابوں کا نہیں مجھ پہ طواف

چومنا فرض ہے میرے لئے ہر رنگ کے پھول

ان کے آنگن میں بھی بربادی سدا راج کرے

بوتے رہتے ہیں جو ہر وقت یہاں جنگ کے پھول

آؤ سب مل کے کریں موت کی ایسی تیسی

توڑتی رہتی ہے بیدرد یوں ہر رنگ کے پھول

احمد فواد