"Phool Chahiya They Magar Hath Main Aaye Pathar" A Beautiful Urdu Ghazal By saghar Siddiqui

پھول چاہے تھے مگر ہاتھ میں آئے پتھر

ہم نے آغوشِ محبت میں سلائے پتھر

وحشتِ دل کے تکلف کی ضرورت کے لئے

آج اُس شوخ نے زلفوں میں سجائے پتھر

اُن کے قدموں کے تلے چاند ستارے دیکھے

اپنی راہوں میں سلگتے ہوئے پائے پتھر

میں تری یاد کو یوں دل میں لئے پھرتا ہوں

جیسے فرہاد نے سینے سے لگائے پتھر

فکرِ ساغر ؔ کے خریدار نہ بھولیں گے کبھی

میں نے اشکوں کے گہر تھے جو بنائے پتھر

ساغرؔ صدیقی

"Aysi Tajalliyan Hain Kahan Aftab Main" A Beautiful Urdu Ghazal By saghar Siddiqui

ایسی تجلیاں ہیں کہاں آفتاب میں

انوار خاص ہیں مرے جامِ شراب میں

یزداں نے مسکرا کے بڑی دیر میں لکھا

اک لفظ آرزو مرے دل کی کتاب میں

اب ذوقِ دید میں ہے شعورِ حیاتِ نو

جلووں کو احتیاط سے رکھو کتاب میں

محجوب تیرے حسن سے غنچوں کی آبرو

خوشبو ترے لبوں کی بسی ہے گُلاب میں

ہے باغباں کی ترچھی نظر اتنی بات پر

شعلوں کا ذکر آگیا شبنم کے باب میں

ساغر کسی کی یاد میں جب اشکبار تھے

کتنے حسین دن تھے جہانِ خراب میں

(ساغر صدیقی)

"Kis Musar'arat Say Puhonche Thay Hum Bazame Main" A Beautiful Urdu Ghazal By saghar Siddiqui

کس مسرت سے پہنچے تھے ہم بزم میں

روح کی تشنگی کو چھپائے ہوئے

ساقیا دور آیا چلا بھی گیا اور

 ہم رہ گئے جام اٹھائے ہوئے

کیوں نظر پھیر لی مجھ سے میرے صنم

چھپ کے بیٹھے ہو کیوں دل چرائے ہوئے

ایک مدت ہوئی تم کو دیکھا نہیں

اک زمانہ ہوا مسکرائے ہوئے

موت بیمار غم کو اب آنے کو ہے

چھوڑو اب اس ندامت سے کیا فائدہ

آخری وقت ہے ہنس کے رخصت کرو

دیکھو بیٹھو نہ یوں سر جھکائے ہوئے

پھول کی زندگی اک تبسم سہی

یہ تبسم بھی ہر اک کو ملتا نہیں

ہم کو دیکھو کہ ہم ہیں چمن میں مگر

اک زمانہ ہوا مسکرائے ہوئے

شمع بجھنے کو ہے چاند چھپنے کو ہے

رات ڈھلنے کو ہے دن نکلنے کو ہے

اب تو آ جا صنم کب سے بیٹھے ہیں ہم

اپنی پلکوں پہ تارے سجائے ہوئے

"Aik Naghma Aik Ghucha Aik Tara Aik Jaam" A Beautiful Urdu Ghazal By saghar Siddiqui

ایک نغمہ ایک غنچہ ایک تارا ایک جام

اے غم جا نا غم دوراں تجھے میرا سلام

زلف آوارہ گریباں چاک گھبرائ نظر

ان دنوں یہ ہے جہان ز دگانی کا نظام

چند تارے ٹوٹ کر دامن پہ مرے آگرے

میں نے ستاروں سے پوچھا تھا تیرے غم کا مقام

کہ رہے ہیں چند بچھڑے رہروؤں کے نقش پا

ہم کریں گے انقلاب جستجو کا اہتمام

پڑ گئیں پیرا ہن صبح چمن میں سلوٹیں

یاد آ کر رہ گئ ہے بیخودی کی ایک شام

تیری عصمت ہو کہ ہو میرے ہنر کی چاندنی

وقت کے بازار میں ہر چیز لگتی ہے دام

ہم بنائیں گے یہاں ساغر نئ تصویر شوق

ہم تخیل کے مجدد ہم تصور کے امام

ساغر

"Aik Wada Hai Kisi Ka Jo Wafa Hota Nahi " A Beautiful Urdu Ghazal By saghar Siddiqui

ایک وعدہ ہے کسی کا جو وفا ہوتا نہیں

ورنہ ان تاروں بھری راتوں میں کیا ہوتا نہیں

جی میں آتا ہے الٹ دیں انکے چہرے کا نقاب

حوصلہ کرتے ہیں لیکن حوصلہ ہوتا نہیں

شمع جسکی آبرو پر جان دے دے جھوم کر

وہ پتنگا جل تو جاتا ہے ، فنا ہوتا نہیں

اب تو مدت سے رہ و رسمِ نظارہ بند ہے

اب تو انکا طور پر بھی سامنا ہوتا نہیں

ہر شناور کو نہیں ملتا طلاطم سے خراج

ہر سفینے کا محافظ ناخدا ہوتا نہیں

ہر بھکاری پا نہیں سکتا مقامِ خواجگی

ہر کس و ناکس کو تیرا غم عطا ہوتا نہیں

ہائے یہ بیگانگی اپنی نہیں مجھ کو خبر

ہائے یہ عالم کہ تُو دل سے جُدا ہوتا نہیں

ساغر صدیقی

"Ay Dil e Beqarar Chup Ho Ja " A Beautiful Urdu Ghazal By saghar Siddiqui

اے دل بے قرار چپ ہو جا

جا چکی ہے بہار چپ ہو جا

اب نہ آئیں گے روٹھنے والے

دیدۂ اشک بار چپ ہو جا

جا چکا کاروان لالہ و گل

اڑ رہا ہے غبار چپ ہو جا

چھوٹ جاتی ہے پھول سے خوشبو

روٹھ جاتے ہیں یار چپ ہو جا

ہم فقیروں کا اس زمانے میں

کون ہے غم گسار چپ ہو جا

حادثوں کی نہ آنکھ کھل جائے

حسرت سوگوار چپ ہو جا

گیت کی ضرب سے بھی اے ساغرؔ

ٹوٹ جاتے ہیں تار چپ ہو جا

"Buzurgoon Ki Duain Mil Rahi Hain" A Beautiful Urdu Ghazal By saghar Siddiqui

بزرگوں کی دعائیں مل رہی ہیں

محبت کو سزائیں مل رہی ہیں

فروزاں ہیں تمہارے غم کے دیپک

بڑی روشن فضائیں مل رہی ہیں

حسین گیسو ہیں شانوں پر پریشاں

گلے ان سے گھٹائیں مل رہی ہیں

شعور_ بزم تک جن کو نہیں ہے

انہیں رنگیں ادائیں مل رہی ہیں

ترا آنچل ہوا میں اڑ رہا ہے

ترانوں کو نوائیں مل رہی ہیں

چلو بادہ کشوں میں تیرہ بختو

ستاروں کو ضیائیں مل رہی ہیں

وفاوں کا صلہ ساغر"" وطن میں

بہت ارزاں جفائیں مل رہی ہیں

"Bigra Jo Naqsh e Zeest Bana Shahkar e Zeest" A Beautiful Urdu Ghazal By saghar Siddiqui

 بگڑا جو نقشِ زیست بنا شاہکارِ زیست

ایسے ملے کہ بن گئے پروردگارِ زیست

کچھ اس طرح سے زیست کو اپناوٴ دوستو !

تا حشر موت کو بھی رہے انتظارِ زیست

دے حادثاتِ نو کی صراحی سے ایک جام

ساقی کو دو ! اُترنے لگا ہے خمارِ زیست

ملاح کو قبول تھی سولی رقیب کی

منصور زیست کےلئے کافی ہے دارِ زیست

اٹکی ہوئی ہے نوکِ مثرہ پر لہو کی بوند !

کانٹوں میں مل رہی ہے عروسِ بہارِ زیست

لائیں غزل کے شہر سے تشبیہہ کے چراغ

اے ہم سخن ! چلو کہ سجائیں دیارِ زیست

ساغر کی زندگی پہ کوئی تبصرہ نہ کر

اک شمع جل رہی ہے سرِ رہگزارِ زیست

"Ban Gaye Ashak Jafa Ki Tasveer" A Beautiful Urdu Ghazal By saghar Siddiqui

بن گئے اشک جفا کی تصویر

کھنچ گئی آج صدا کی تصویر

احتیاط دلِ عاشق لازم

ٹوٹ جاتی ہے وفا کی تصویر

جگمگاتی ہے غم ہستی کے

رنگ و روغن سے فضا کی تصویر

بول اُٹھی تیری لے میں ساغر

آسمانوں پہ دعا کی تصویر

"Bhanwar Aanay Ko Hai Ay Ahale Ahle Kashti Na Khuda Chun Lain" A Beautiful Urdu Ghazal By saghar Siddiqui

بھنور آنے کو ہے اے اہلِ کشتی ناخدا چُن لیں

چٹانوں سے جو ٹکرائے وہ ساحل آشنا چُن لیں

زمانہ کہہ رہا ہے مَیں نئی کروٹ بدلتا ہُوں

انوکھی منزلیں ہیں کچھ نرالے رہنما چُن لیں

اگر شمس و قمر کی روشنی پر کُچھ اجارہ ہے

کِسی بے دَرد ماتھے سے کوئی تارِ ضیا چُن لیں

یقینا اب عوامی عَدل کی زنجیر چھنگے گی

یہ بہتر ہے کہ مُجرم خود ہی جُرموں کی سزا چُن لیں

اسیری میں کریں حُسنِ گلستاں کی نگہانی

قفس میں بیٹھ کر طائر ذرا رنگِ فضا چُن لیں

بگولے نکہتِ گل کے نمائندے کہاں ساغر

سُنیں جو بات پُھولوں کی وہ ہمرازِ صبا چُن لیں

ساغر صدیقی

"Phool Jalte Hain Har Jalte Hain" A Beautiful Urdu Ghazal By saghar Siddiqui

پھول جلتے ہیں ہار جلتے ہیں

چاندنی کے مزار جلتے ہیں

اے مصور کیا تماشا ہے

رنگ سے شاہکار جلتے ہیں

مدتوں سے ہے سرد میخانہ

دیر سے میگسار جلتے ہیں

تیرے آنچل کی مست چھاوں میں

بے خودی کے دیار جلتے ہیں

کچھ پتنگے چراغ کی لو تکنے پر

کتنے بے اختیار جلتے ہیں

فکر ساغر کی گرمیاں مت پوچھ

اس چتا میں نگار جلتے ہیں

ساغر صدیقی

"Mit Gayi Roshini Main Tahreerain, Jal Gayi Chandni Main Tasveerain" A Beautiful Urdu Ghazal By saghar Siddiqui

مِٹ گئیں روشنی میں تحریریں جل گئیں چاندنی میں تصویریں

 ہائے وہ تیرے عنبریں گیسُو لے اُڑے زندگی کی تفسیریں

سُرخ کنگن کلائیوں میں ہلے ہل گئیں دو جہاں کی تقدیریں

 رسمِ فرہاد پھر کریں زندہ آؤ پھر پتھروں کے دِل چیریں

اے مریضِ الم  ! تسلی رکھ چارہ گر کر رہے ہیں تدبیری

 ہاں اُچھالو حیات کے ساغر صبحِ محشر میں اور تاخیریں

"Phool Maslain Tu Unhain Naghma o Jhankar Milain " A Beautiful Urdu Ghazal By saghar Siddiqui

پھول مَسلیں تو انہیں نغمہ و جھنکار ملیں

میں نے کانٹے تو نہیں بوئے کہ انگار ملیں

آنکھ لرزاں ہے سرِ محفلِ ہستی اے دوست

ان کی چلمن کے قرِیں تشنۂ دیدار ملیں

اس کو ادراک کی پُرنُور زباں کہتے ہیں

جس میں انساں کی تعظیم کے اطوار ملیں

ایسی مجروح تمنا ہی صلیبِ غم ہے

جس کو غنچے بھی بہاروں میں گرفتار ملیں

خونِ دل شرط ہے اے یار! بصیرت کے لئے

یہ بھی ممکن ہے کہ صحراؤں میں گلزار ملیں

حیف اس چارہ گرِ وقت کی قسمت ساغرؔ

جس کو ہر گام پہ تقدیر کے بیمار ملیں

ساغرؔ صدیقی

"Tari Dunya Main Ya Rab Zeest K Saman Jalte Hain" A Beautiful Urdu Ghazal By saghar Siddiqui

تری دنیا میں یارب زیست کے سامان جلتے ہیں

فریب_ زندگی کی آگ میں انسان جلتے ہیں

دلوں میں عظمت_ توحید کے دیپک فسردہ ہیں

جبینوں پر ریا و کبر کے فرمان جلتے ہیں

ہوس کی باریابی ہے خرد مندوں کی محفل میں

روپہلی ٹکلیوں کی اوٹ میں ایمان جلتے ہیں

حوادث رقص فرما ہیں قیامت مسکراتی ہے

سنا ہے ناخدا کے نام سے طوفان جلتے ہیں

شگوفے جھولتے ہیں اس چمن میں بھوک کے جھولے

پہاروں میں نشیمن تو بہر عنواں جلتے ہیں

کہیں پازیب کی چھن چھن میں مجبوری تڑپتی ہے

ریا دم توڑ دیتی ہے سنہرے دان جلتے ہیں

مناؤ جشن مے نوشی بکھیرو زلف_ مے خانہ

عبادت سے تو ساغر دہر کے شیطان جلتے ہیں

ساغر صدیقی

"Tari Nazroon K Isharoon Say Khail Sakta Hun" A Beautiful Urdu Ghazal By saghar Siddiqui

تری نظر کے اشاروں سے کھیل سکتا ہوں

جگر فروز شراروں سے کھیل سکتا ہوں

تمہارے دامن رنگیں کا آسرا لے کر

چمن کے مست نظاروں سے کھیل سکتا ہوں

کسی کے عہد محبت کی یاد باقی ہے

بڑے حسین سہاروں سے کھیل سکتا ہوں

مقام ہوش و خرد انتقام وحشت ہے

جنوں کی راہ گزاروں سے کھیل سکتا ہوں

مجھے خزاں کے بگولے سلام کرتے ہیں

حیا فروش چناروں سے کھیل سکتا ہوں

شراب و شعر کے دریا میں ڈوب کر ساغرؔ

سرور و کیف کے دھاروں سے کھیل سکتا ہوں

"Tary Ghum Ki Tilawat Kar Rahain Hain" A Beautiful Urdu Ghazal By saghar Siddiqui

ترے غم کی تلاوت کر رہے ہیں

ستاروں سے شکایت کر رہے ہیں

جنوں کے تجربوں کی نگہداری

بہ اندازِ فراست کر رہے ہیں

ترے شانوں پہ تابندہ نشاطے

بہاروں کی سخاوت کر رہے ہیں

نہ دے ہمت ہمیں مدہوشیوں کی

ذرا پی کر عبادت کر رہے ہیں

سحر کے بعد بھی شمعیں جلاؤ

کہ پروانے شرارت کر رہے ہیں

خداوندانِ گلشن یہ شگوفے

بہاروں سے بغاوت کر رہے ہیں

مرتب غم کے افسانوں سے ساغر

مسرت کی حکایت کر رہے ہیں

(ساغر صدیقی)

"Tafreeq Nay Jadu Hi Jagaya Hai Bala Ka" A Beautiful Urdu Ghazal By saghar Siddiqui

 تفریق نے جادو ہی جگایا ہے بلا کا

خطرے میں ہے اے یار چمن مہرو وفا کا

توہین ہے درویش کا اس شہر میں جینا

ہو فاقہ کشی نام جہاں صبر و رضا کا

اب تک کا تفکر غم تقدیر کا چارہ

سینے میں پتا رکھتے ہیں جو ارض و سما کا

جی چاہتا ہے اے میرے افکار کی مورت

ملبوس بنا دوں تجھے تاروں کی ردا کا

محفوظ رہیں میرے گلستاں کی فضا میں

ہو قتل گل و لالہ تقاضا ہے صبا کا

جلتے ہوئے دیکھے وہی معصوم شگوفے

تھا جن کو بھروسہ تیرے دامن کی ہوا کا

کچھ سرد ہی آہیں تو ڈوبتے آنسو!

ساغر یہ صلا تجھ کو ملا سوز نوا کا! 

"Tari Nazar Ka Rang Baharoon Nay Lelia" A Beautiful Urdu Ghazal By saghar Siddiqui

تیری نظر کا رنگ بہاروں نے لے لیا

افسردگی کا روپ ترانوں نے لے لیا

جس کو بھری بہار میں غنچے نہ کہہ سکے

وہ واقعہ بھی میرے فسانوں نے لے لیا

شاید ملے گا قریۂ مہتاب میں سکوں

اہل خرد کو ایسے گمانوں نے لے لیا

یزداں سے بچ رہا تھا جلالت کا ایک لفظ

اس کو حرم کے شوخ بیانوں نے لے لیا

تیری ادا سے ہو نہ سکا جس کا فیصلہ

وہ زندگی کا راز نشانوں نے لے لیا

افسانۂ حیات کی تکمیل ہو گئی

اپنوں نے لے لیا کہ بیگانوں نے لے گیا

بھولی نہیں وہ قوس قزح کی سی صورتیں

ساغرؔ تمہیں تو مست دھیانوں نے لےلیا

"Taree Daman Ki Hava Mangte Hain" A Beautiful Urdu Ghazal By saghar Siddiqui

تیرے دامن کی ہوا مانگتے ہیں

ہم بھی جینے کی دُعا مانگتےہیں

مُطربُو!کوئی اچھوتا نغمہ

ساز آہنگ و صدا مانگتے ہیں

صحنِ کعبہ کے ُپجاری مچلے

آستینوں میں خدا مانگتے ہیں

ماہ و انجم کے جھرُوکے اکثر

کِس کے عارض کی ضیا مانگتے ہیں

پھر پتنگوں میں خدائی جاگی

شعلئہ حشر نما مانگتے ہیں

بندہ پرور!کوئی خیرات نہیں

ہم وفاؤں کا سلہ مانگتے ہیں

مے کَدہ ہو کے کلیسہ ہو ساغرؔ

ساری دُنیا کا بھلا مانگتے ہیں

 ساغرؔ صدیقی