Jadu Naya Lafzoon Ka Jaganay Nahi AaiA Beautiful Urdu Ghazal By rashid maheen

جادو نیا لفظوں کا جگانے نہیں آئی

کاغذ پہ کوئی پھول کھلانے نہیں آئی

صاحب میں ترے ناز اٹھانے نہیں آئی

بس دیکھنے آئی ہوں منانے نہیں آئی

حیرت ہے کہ ان شعبدہ بازوں میں بھی رہ کر

بے پَر کی کوئی بات اڑانے نہیں آئی

آئی ہوں ترے شہر کی گلیوں میں بھٹکنے

لیکن کوئی آواز لگانے نہیں آئی

نکلی ہوں کہ کچھ دشت نوردی کی ہوا لوں

میں عشق کی بارش میں نہانے نہیں آئی

آئی ہوں کہ اُس پھول سے پیمان تھا میرا

رسم و رہِ دنیا تو نبھانے نہیں آئی

ماہین مجھے اُس گلِ حیرت کی طلب تھی

ایسے ہی تو میں آئنہ خانے نہیں آئی

راشد ماہین