Sar Say Bhanda Hai Kafan Ishaq Main Tara Yani '' A Beautiful Urdu poetry By Mir Taqi Mir

میں بھی دنیا میں ہوں اک نالہ پریشاں یک جا

دل کے سو ٹکڑے مرے پر سبھی نالاں یک جا

پند گویوں نے بہت سینے کی تدبیریں لیں

آہ ثابت بھی نہ نکلا یہ گریباں یک جا

تیرا کوچہ ہے ستمگار وہ کافر جاگہ

کہ جہاں مارے گئے کتنے مسلماں یک جا

سر سے باندھا ہے کفن عشق میں تیرے یعنی

جمع ہم نے بھی کیا ہے سر و ساماں یک جا

کیونکے پڑتے ہیں ترے پاؤں نسیم سحری

اس کے کوچے میں ہے صد گنج شہیداں یک جا

تو بھی رونے کو ملا دل ہے ہمارا بھی بھرا

ہو جے  اے ابر بیابان میں گریاں یک جا

بیٹھ کر میرؔ جہاں خوب نہ رویا ہووے

ایسی کوچے میں نہیں ہے ترے جاناں یک جا

میر تقی میر