" Sar Maqtal Hamain Nagmat Ki Talim Daitay Hain" A Beautiful Urdu Ghazal By saghar Siddiqui

 ‏سرِ مقتل ہمیں نغمات کی تعلیم دیتے ہیں

یہاں اہلِ نظر ظلمات کی تعلیم دیتے ہیں

‏یہاں کلیاں مہکتی ہیں مگر خوشبو نہیں ہوتی

شگوفے برملا آفات کی تعلیم دیتے ہیں

‏یہاں کچھ لوگ ایسے بھی زرتابی قباؤں میں

ســحر کا نام لے کر رات کی تعلیم دیتے ہیں

‏یہاں کچھ لوگ ایسے بھی ہیں عرفانِ بہاراں سے

وہ پھولوں کو نئے جذبات کی تعلیم دیتے ہیں

‏رہِ تقدیر اس دن کے لیے کیا دُھوپ اور سائے

تیرے گیسُو جنہیں حالات کی تعلیم دیتے ہیں

‏ہمیں زیبا نہیں دیتا رہِ دشوار کا منظر

کہ صحراؤں میں بھی برسات کی تعلیم دیتے ہیں

‏جہاں ساغر شرابِ زندگی اِک زہرِ قاتل ہے

یقیں والے وہاں خدشات کی تعلیم دیتے ہیں

ساغر صدیقی