سید
آنسؔ معین بلے کے متفرق اشعار
.........
میری قامت سے ڈر نہ جائیں لوگ
میں ہوں سورج، مجھے دیا لکھنا!!
ـــــــــــــــــــــــــــــــــــــــــــــــــــــ
وسعتِ دریا میں گم ہو جاؤں گا
ایک بچے کی طرح سو جاؤں گا
ـــــــــــــــــــــــــــــــــــــــــــــــــــــ
وہ جو پیاسا لگتا تھا سیلاب ذدہ تھا
پانی پانی کہتے کہتے ڈوب گیا ہے
ـــــــــــــــــــــــــــــــــــــــــــــــــــــ
اس کے پیچھے چھپی ہیں کتنی دیواریں
جسم کی یہ دیوار گرا کر دیکھوں گا
ـــــــــــــــــــــــــــــــــــــــــــــــــــــ
میں اپنی ذات کی تنہائی میں مقید تھا
پھر اس چٹان میں اک پھول نے شگاف کیا
ـــــــــــــــــــــــــــــــــــــــــــــــــــــ
اس دور میں کچھ اور ہیں سچائی کے معیار
یہ بات الگ زہر کی تاثیر وہی ہے
ـــــــــــــــــــــــــــــــــــــــــــــــــــــ
ہر ایک شہر کا معیار مختلف دیکھا
کہیں پہ سر کہیں پگڑی کا احترام ہوا
ـــــــــــــــــــــــــــــــــــــــــــــــــــــ
ان لوگوں کا جھک کر ملنا اور برا ہے
بڑے پرندوں کی نیچی پرواز سے ڈرنا!!
ـــــــــــــــــــــــــــــــــــــــــــــــــــــ
رہتا ہوں جس زمیں پہ وہی اوڑھ لوں گا میں
جائے اماں اک اور بھی ہوتی ہے گھر کے بعد
ـــــــــــــــــــــــــــــــــــــــــــــــــــــ
چھوٹ جائیں قیدِ شب سے رسمِ خود سوزی کے بعد
اور جگنو بن کے نکلیں روشنی اوڑھے ہوئے
ـــــــــــــــــــــــــــــــــــــــــــــــــــــ
آنسؔ تم بھی سامنے رکھ کر آئینہ
زور سے اک آواز لگاؤ، لوٹ آؤ!!
ـــــــــــــــــــــــــــــــــــــــــــــــــــــ
مجھ کو معلوم نہیں تھا ترا منصب آنسؔ
نامور تھا تجھے بے نام لکھا تھا میں نے
ـــــــــــــــــــــــــــــــــــــــــــــــــــــ
چپ رہ کر اظہار کیا ہے کہہ سکتے تو آنسؔ
ایک علیحدہ طرزِ سخن کا تجھ کو بانی کہتے!!
(سید آنس معین بلے)
No comments:
Post a Comment