Ghoray say Khatab '' A Beautifull Urdu Ghazal By Raees Farogh

گھوڑے سے خطاب

جاؤ پہاڑوں پر جاؤ

اودی نیلی وادی میں

اک پیاری سی گھوڑی ہے

کمرا

مجھے نہ کھولو

مرے اندھیرے میں

ایک لڑکی

لباس تبدیل کر رہی ہے

قاتل

آج بھی

اس کے دونوں ہاتھ

لرز رہے تھے

اور

ہر انگلی کے سرے پر

ایک ستارہ چمک رہا تھا

انکل

وہ اس روز

بہت رویا اور بہت ہنسا

جب پہلی بار اسے معلوم ہوا

اس کے باپ کے سارے دوست

بدمعاش ہیں

ائیر پورٹ

اگر تو نہ جاتی

تو اے جانِ جاں

مِرا پیار

جاڑے کی بارش میں

سی آف کرنے کی لذّت سے

محروم رہتا

پڑھے لکھے لوگ

آپ پھر آ گئے

اگر اب خیالی ٹرینوں کے نیچے سے گزریں

تو بیوی کا ہاتھ

اور اولاد کا ساتھ بھی

چھوڑ دیں

چرس نوش

کیا خبر ہے

کہ کسی روٹ سے بھاگی ہوئی بس

آخر شب

مرے بیڈ روم میں گھس آئے کبھی

اور پیٹرول کے نشے میں

کسی اونگھتے صوفے سے کہے

آؤ ٹوئسٹ کریں

نا معلوم کی پہاڑیوں سے آواز

میں سمندر کا ہاتھ ہوں

اور میری ذمہ داریوں میں سے ایک

وہ شارک ہے

جو مشروم کی خوراک بنے

نئے پرندے

جہاں درختوں میں آگ لگنے سے

اژدھے جل کے راکھ ہوتے ہیں

ان پہاڑوں کی گھاٹیوں میں

ہمارے بیٹے

نئے پرندے تلاش کرنے

چلے گئے ہیں

یہ بات سر جان مارشل کو معلوم نہیں

یہ بات اس کھلاڑی کو معلوم ہے

جو ہر شے کو گیند بنا دیتا ہے

وہ ہماری بہنوں کی سجی ہوئی کاریں دیکھتا ہے

اور کھیلتا ہے

وہ ہمارے بھانجوں کی پیدائش دیکھتا ہے

اور کھیلتا ہے

لیڈی ڈفرن

ہمیشہ پھولتا پھلتا ترا وجود رہے

جو آج کل تری باتوں میں سرسراتی ہے

وہ آگ وقت گزرنے کے باوجود رہے

میں چاہتا ہوں تری مامتا کی بانہوں میں

ہر ایک سال نئے پھول کی بہار آئے

تمام عمر تری چھاتیوں میں دودھ رہے

شیرانی

منے!

شادی کس سے کرو گے

آپ سے

ہا ہا ہا

شریر کہیں کے

اب سلمیٰ باجی

قبرستان کا حصہ ہیں

رئیس فروغ