"MAin Iltfat e Yar Ka Qail Nahi Hun Dost""A Beautiful Urdu Ghazal By saghar Siddiqui

میں التفاتِ یار کا قائل نہیں ہوں دوست

سونے کے نرم تار کا قائل نہیں ہوں دوست

مُجھ کو خزاں کی ایک لُٹی رات سے ہے پیار

میں رونقِ بہار کا قائل نہیں ہُوں دوست

ہر شامِ وصل ہو نئی تمہیدِ آرزو

اتنا بھی انتظار کا قائل نہیں ہوں دوست

دو چار دن کی بات ہے یہ زندگی کی بات

دو چار دن کے پیار کا قائل نہیں ہُوں دوست

جس کی جھلک سے ماند ہو اشکوں کی آبُرو

اس موتیوں کے ہار کا قائل نہیں ہُوں دوست

لایا ہُوں بے حساب گناہوں کی ایک فرد

محبوب ہُوں شُمار کا قائل نہیں ہُوں دوست

ساغر بقدرِ ظرف لُٹاتا ہُوں نقدِ ہوش

ساقی سے میں ادُھار کا قائل نہیں ہوں دوست

(ساغر صدیقی)