کنایہ کار کوئی چشم ِ نیلگوں ہے کہ یوں ہمیں شعور کہاں تھا، حیات یوں ہے، کہ یوں urdu, ghazal,

کنایہ کار کوئی چشم ِ نیلگوں ہے کہ یوں 

ہمیں شعور کہاں تھا، حیات یوں ہے، کہ یوں

جو گِرد باد تھے اب ہیں وہ خاک افتاده 

ہوائے دشت صدا زن ہے، سکون یوں ہے، نہ یوں

خِرد شعار زمانے کا طرز اپنی جگہ

ہمیں کچھ اور غرض ہے، ہمیں جنوں ہے کہ یوں

لہو میں یوں تو لہکتی نہیں ہے کیا کیا لہر

مگر جو ایک تقاضائے اندروں ہے کہ یوں

عطائے علم کا ہو قرض کس طرح چُکتا

سر ِ ادب ہے خمیدہ، قلم نگوں ہے کہ یوں

جہت، جہت کئی معانی کھلے تو باغ ھنسا

نگار ِ گُل نے کہا یہ عجب فسوں ہے، کہ یوں

کہا کہ کیسے بیاں ہوں چراغ و خیمہ و خواب

دریدہ سینہ ء گُل ، دیدہ پُر ز خوں ہے، کہ یوں

اگر قرینہ ء تابندگی نہیں اختر !!

تو پِھرجواز ہے کیا اور ضد ہی کیوں ہے، کہ یوں !!!