Barh Gaya Tujh Say Woh Sitam ejad A Beautiful Urdu Poetry By Dagh Dehlawi ghazals

دل میں کیا مہرباں نہیں آتی

بات کہنے میں ہاں نہیں آتی

بڑھ گیا تجھ سے وہ ستم ایجاد

شرم سے آسماں نہیں آتی

کس طرح قول کے ہوں وہ سچّے

میرے منہ میں زُباں نہیں آتی

اُس ستمگر کو یاد بھی میری

بھول کر ناگہاں نہیں آتی

ہے طبیعت بھی اپنی ہر جائی

کس جگہ یہ کہاں نہیں آتی

جل کے دل خاک ہو گیا شاید

بوئے سوزِ نہاں نہیں آتی

گو بلا ہے مفارقت تیری

نہیں آتی جہاں نہیں آتی

بیخودی میں کہا تھا اُن سے حال

یاد وہ داستاں نہیں آتی

شب غم مر گیا موذن کیا

آج بانگِ اذاں نہیں آتی

وہ اِشاروں سے کام لیتے ہیں

گفتگو درمیاں نہیں آتی

کام کر جائے گی یہ خاموشی

ہم کو آہ و فغان نہیں آتی

ہے نزاکت بھری خبر اُن کی

کہ وہاں سے یہاں نہیں آتی

تجھ کو ہو گا ثواب فرقت میں

اے اجل کیوں یہاں نہیں آتی

دل لگاتے ہی ہم تو مرتے ہیں

نوبتِ امتحاں نہیں آتی

روز محشر بھی تیرے کشتے کے

تن میں روحِ رواں نہیں آتی

داغ ہی جانتا ہے طرزِ وفا

تم کو اے مہرباں نہیں آتی

داغ دھلوی