Rah Dakhaingay na Dunya Say janay walay A Beautiful Urdu Poetry By Dagh Dehlawi ghazal

  

دیکھتا جا ادھر او قہر سے ڈرنے والے

نیچے نظریں کیے محشر میں گذرنے والے

راہ دیکھیں گے نہ دنیا سے گذرنے والے

ہم تو جاتے ہیں، ٹھہر جائیں ٹھہرنے والے

قلزمِ عشق سے اے خضر! ہمیں خوف نہیں

بیٹھ کر تہ میں ابھرتے ہیں ابھرنے والے

اس گذر گاہ سے پہنچیں تو کہیں منزل تک

جیسے گذرے گی گذاریں گے گذرنے والے

منہ نہ پھیرا جگر و دل نے صفِ مژگاں سے

سچ تو یہ، وہ بھی برے ہوتے ہیں مرنے والے

ہو کے لبریز نہ چھلکے گا مرا ساغرِ دل

میکدے سو ہوں اگر لاکھ ہوں بھرنے والے

ایک تو حسن بلا، اس پہ بناوٹ آفت

گھر بگاڑیں گے ہزاروں کے سنورنے والے

کیا جہانِ گذَراں میں بھی لگے ہے گذری

مول لے جاتے ہیں غم یاں سے گذرنے والے

قتل ہوں گے ترے ہاتھوں سے خوشی اس کی ہے

آج اترائے ہوئے پھرتے ہیں مرنے والے

تیرے گیسوئے پریشان نہ کریں سودائی

سر نہ ہو جائیں کسی کے یہ بکھرنے والے

آہ کے ساتھ فلک سے یہ ندائیں آئیں

جل گئے سایۂ طوبیٰ میں ٹھہرنے والے

حشر میں لطف ہو جب ان سے ہوں دو دو باتیں

وہ کہیں، کون ہو تم؟ ہم کہیں، مرنے والے

کشتیِ نوح سے بھی کود پڑوں طوفاں میں

دیں سہارا جو مجھے پار اترنے والے

خوش نوائی نے رکھا ہم کو اسیر اے صیّاد!

ہم سے اچھے رہے صدقے میں اترنے والے

کیا تری کاکلِ شب گُوں کی بلائیں لیں گے

بوالہوس تیرگیِ بخت سے ڈرنے والے

ہے وہی قہر، وہی جبر، وہی کبر و غرور

بت خدا ہیں مگر انصاف نہ کرنے والے

غسل میت کی شہیدوں کو ترے کیا حاجت

بے نہائے بھی نکھرتے ہیں نکھرنے والے

حضرتِ داغؔ جہاں بیٹھ گئے بیٹھ گئے

اور ہوں گے تری محفل سے ابھرنے والے

 داغ دھلوی