dil soz say khali ha nigah pak nahi ha ''A Beautiful urdu Ghazal by Allama Muhammad Iqbal

 دل سوز سے خالی ہے نگاہ پاک نہیں ہے

پھر اس میں عجب کیا ہے تو بے باک نہیں ہے

ہے ذوق تجلی بھی اسی خاک میں پنہاں

غافل !تو نرا صاحب ادراک نہیں ہے

وہ آنکھ کہ ہے سرمۂ افرنگ سے روشن

پرکار وسخن ساز ہے نم ناک نہیں ہے

کیا صوفی و ملا کو خبر میرے جنوں کی

ان کا سر دامن بھی ابھی چاک نہیں ہے

کب تک رہے محکومی انجم میں میری خاک

یا میں نہیں یا گردش افلاک نہیں ہے

بجلی ہوں نظر کوہ و بیاباں پہ ہے میری

میرے لئے شایاں خس وخاشاک نہیں ہے

عالم ہے فقط مؤمن ِ جاں باز کی میراث

مؤمن نہیں تو صاحب لولاک نہیں ہے

                

                                             بال جبریل