Beautiful Urdu poetry By Khadim Ruzmi,

خادم رزمی 

بس ایک خواب بکھرنے کے انتظار میں ہیں

طویل , ھم کوئی کار جہاں نہیں رکھتے ۔۔ 

۔۔۔۔۔۔۔۔۔۔۔

خود کلامی میں اس قدر وحشت

کوئی دشمن ہو روبرو جیسے ۔۔ !

۔۔۔۔۔۔۔۔۔۔۔۔

گمان نہ کر کہ ہمیں مفلسی نے اکسایا

ہم اس لیے ہیں مقابل ترے کہ حق پر ہیں

۔۔۔۔۔۔۔۔۔۔۔

ہم کو جانا تھا کس طرف رزمیؔ!

اور کس سمت ہیں رواں ہم لوگ

۔۔۔۔۔۔۔۔۔۔۔۔

نام غیروں کا لیےجاتے ہیں ورنہ اب تک

یہ وہ " بستی" ہے,جہاں اپنے زباں کاٹتے ہیں

۔۔۔۔۔۔۔۔۔۔۔۔۔

صفحہ زیست پہ وہ لفظ رقم دیکھے ھیں

جو کسی شوخ کی تحریر نہیں ھو سکتی

ھائے وہ لوگ مزاروں کے پجاری جن سے

زندہ انسانوں کی توقیر نہیں ھو سکتی

۔۔۔۔۔۔۔۔۔۔۔۔۔۔۔۔۔۔۔

اک روز اسے دھجیاں ھونا ھی تھا رزمی

پگ ایک تھی وہ جس کے طلبگار بہت تھے

۔۔۔۔۔۔۔۔۔۔۔۔۔۔۔۔۔۔۔

کسے بتائیں کہ خیمہ بردوش پھرتے عمریں گذر گئی ھیں

وطن میں رہ کر بھی بے وطن ھیں ھم ایسے خانہ خراب اب بھی

۔۔۔۔۔۔۔۔۔۔۔۔۔۔۔۔۔۔۔

چاٹ جائے گا ھرے کھیتوں کی شبنم آفتاب

یہ پسینہ جس کا ھے وہ دیکھتا رہ جائے گا

۔۔۔۔۔۔۔۔۔۔۔۔۔۔۔۔۔۔۔۔۔۔

مری زمیں کو نہیں کرب سے نجات ملی

مری زمیں پہ پیمبر اتارنے والے

۔۔۔۔۔۔۔۔۔۔۔۔۔۔۔۔۔۔۔۔۔

چیتھڑے پہنے ھوئے پھرتا ھے لیر و لیر سا

ماں کی لوری اک ذرا اپنا سکندر دیکھنا

۔۔۔۔۔۔۔۔۔۔۔۔۔۔۔۔۔۔۔۔۔۔

خدا نے یونہی قیامت کا دن بنایا ھے

کہ آدمی کی سزا کو تو آدمی ھے بہت

۔۔۔۔۔۔۔۔۔۔۔۔۔۔۔۔۔۔۔۔۔۔

غمِ حبیب تو جرمِ وفا کی دین سہی

غمِ حیات مری کس خطا کے باب میں ھے

۔۔۔۔۔۔۔۔۔۔۔۔۔۔۔۔۔۔۔

اک حادثے کاردِ عمل ہے یہ کائنات

بکھرا ہے ایک حرف صدا اتفاق سے

۔۔۔۔۔۔۔۔۔۔۔۔۔۔۔۔۔۔۔۔

کوئی جو پوچھ بھی لے، تو بتا نہیں سکتا

کہ میں نے ایک سفر میں کیے سفر کتنے

۔۔۔۔۔۔۔۔۔۔۔۔۔۔۔۔۔۔۔۔۔۔

وقت پھر بند اک گلی جیسا

کوئی رستہ نہیں گزرنے کا

۔۔۔۔۔۔۔۔۔۔۔۔۔۔۔۔۔۔۔۔۔

یہ جو میرا دیس ہے اس میں چاہے میں بھوکا ہی رہوں

مجھ کو ریشم دھوپ ہے اس کی خاک مرا پشمینہ ہے

۔۔۔۔۔۔۔۔۔۔۔۔۔۔۔۔۔۔۔۔۔

منجمد، رزمیؔ نہ کر دے، برف باری کا سمے

اس لئے خود کو سدا شعلہ بجاں رکھتے ہیں ہم

۔۔۔۔۔۔۔۔۔۔۔

سبز چارہ دھان گندم , باجرہ , گنا , کپاس

یہ مری بستی کی فصلیں ہیں کہ ھر سو قہقہے

پھول جسموں پر لیے سونا سحر کی اوٹرھنی

چوکٹری بھرتے ھوے کھیتوں میں آھو قہقہے

۔۔۔۔۔۔۔۔۔۔

ہر دور میں یہ کیا!کہ ستم ٹوٹے انہی پر

جی جان سے جو تیرے طرفدار بہت تھے

مخلص ہی سہی ہم , مگر اس چشم جہاں میں

یہ جرم کوئی کم ہے کہ نادار بہت تھے

۔۔۔۔۔۔۔۔۔۔۔

ہمیں بھی چاٹ نہ جائےکہیں,ہوا اسکی

کچھ اور دیر جو اس قریہ ہوس میں رہے

یہ عمر بیت گئی ہے تو پھر کھلا رزمی

کہ ہم تو صرف شمار مہہ و برس میں رہے

۔۔۔۔۔۔۔۔۔۔

منظر بن کر، اسے چکانا ہے اک قبر پرانی کا

یہ جو قرض ہے،مجھ پر اپنی مٹی کی مہمانی کا

۔۔۔۔۔۔۔۔۔۔

وہ بے منصب ھوا ھے اب تو اس پر

زبانِ شہر کیا کیا بولتی ھے

مہکتا تھا کبھی اخلاص جن میں

اب ان آنکھوں میں دنیا بولتی ھے

۔۔۔۔۔۔۔۔۔۔۔۔

وہ سب چراغ جلائے ھوئے ھمارے ھیں

جو شعلہ رکھتے ھیں لیکن دھواں نہیں رکھتے

تمام دیس ھی اپنا ھے اس لئے رزمیؔ

کسی بھی شہر میں اپنا مکاں نہیں رکھتے

۔۔۔۔۔۔۔۔۔۔

آئنہ کب انہیں سنبھال سکے

جو خراشیں مری نظر میں ھیں

۔۔۔۔۔۔۔۔۔۔

مری زمیں کو نہیں کرب سے نجات ملی

مری زمیں پہ پیمبر اتارنے والے ۔۔۔ !!