khudi ki shokhi w tandi main kibr o naz nahi '' A Beautiful Ghazal by Allama Muhammad Iqbal

خودی کی شوخی و تندی میں کبر و ناز نہیں
 جو ناز ہو بھی تو بے لذت نیاز نہیں

نگاہِ عشق دلِ زندہ کی تلاش میں ہے
 شکارِ مردہ سزاوارِ شاہباز نہیں

مری نوا میں نہیں ہے ادائے محبوبی
 کہ بانگ صورِ سرافیل دل نواز نہیں

سوالِ مے نہ کروں ساقئ فرنگ سے میں
 کہ یہ طریقۂ رندانِ پاک باز نہیں

ہوئی نہ عام جہاں میں کبھی حکومتِ عشق
 سبب یہ ہے کہ محبت زمانہ ساز نہیں

  

اک اضطرابِ مسلسل ، غیاب ہو کہ حضور
 میں خود کہوں تو مری داستاں دراز نہیں

اگر ہو ذوق تو خلوت میں پڑھ زبورِ عجم
 فغانِ نیم شبی بے نوائے راز نہیں

علامہ محمد اقبال رحمہ اللہ تعالی