Fitna Hashar or Kia Nikla A Beautiful Urdu Poetry By Dagh Dehlawi ghazals

فتنہ حشر اور کیا نکلا

وہ تُمھارے ہی ساتھ کا نکلا

کون دُنیا میں با وفا نکلا

یہ تُمہاری زُبان سے کیا نکلا

وہ ادھر بھول کر جو آ نکلا

میں نے جانا کہ مد عا نکلا

بت کدہ دیکھ کر ہوئی عبرت

میرے مُنہ سے خدا خدا نکلا

درہمِ داغ دل میں ہیں موجود

یہ خزانہ بھرا پُرا نکلا

اُس نے کی مجھ پر انتہا کی جفا

جور کرنے کا حوصلہ نکلا

جان نکلی مریضِ فرقت کی

اب تو ارمان آپ کا نکلا

غیر کے ہاتھ میں تھا وہ ہرجائی

بعد مدت کے یہ پتا نکلا

اب دماغ اُن کا آسماں پر ہے

کیوں مرے مُنہ سے مدعا نکلا

غیر سے اُن سے عشق باہم ہے

درمیاں سے قدم مرا نکلا

ستیاناس ہو ترا اے دل

تو ہمارے نہ کام کا نکلا

پھر بھی اچھا کہو گے غیر کو تم

امتحاں میں اگر بُرا نکلا

میں نے چھوڑا نہ جب انھیں تو کہا

یہ تو ظالم بُری بلا نکلا

داغ کو لوگ رند کہتے ہیں

وہ حقیقت میں پارسا نکلا

داغ دھلوی