Daikh Is Ko hanstay Sab Kay Dam Say Gay Akhr Kar Urdu ghazal by mir taqi mir

دیکھ اس کو ہنستے سب کے دم سے گئے اکھڑ کر

ٹھہرے ہے آرسی بھی دانتوں زمیں پکڑ کر

کیا کیا نیاز طینت  اے ناز پیشہ تجھ بن

مرتے ہیں خاک رہ سے گوڑے رگڑ رگڑ کر

قد کش چمن کے اپنی خوبی کو نیو چلے ہیں

پایا پھل اس سے آخر کیا سرو نے اکڑ کر

وہ سر چڑھا ہے اتنا اپنی فروتنی سے

کھویا ہمیں نے اس کو ہر لحظہ پاؤں پڑ کر

پائے ثبات بھی ہے نام آوری کو لازم

مشہور ہے نگیں جو بیٹھا ہے گھر میں گڑ کر

دوری میں دلبروں کی کٹتی ہے کیونکے سب کی

آدھا نہیں رہا ہوں تجھ سے تو میں بچھڑ کر

اب کیسا زہد و تقویٰ دارو ہے اور ہم ہیں

بنت العنب کے اپنا سب کچھ گیا گھسڑ کر

دیکھو نہ چشم کم سے معمورۂ جہاں کو

بنتا ہے ایک گھر یاں سو صورتیں بگڑ کر

اس پشت لب کے اوپر دانے عرق کے یوں ہیں

یاقوت سے رکھے ہیں جوں موتیوں کو جڑ کر

ناسازگاری اپنے طالع کی کیا کہیں ہم

آیا کبھو نہ یاں ٹک غیروں سے یار لڑ کر

اپنے مزاج میں بھی ہے میرؔ ضد نہایت

پھر مر ہی کے اٹھیں گے بیٹھیں گے ہم جو اڑ کر