Is Dil Ko KAha Us Nay Ya Khush'hal Na Nikla A Beautiful Urdu Poetry By Dagh Dehlawi ghazals

اِس دل کو کہا اُس نے یہ خوشحال نہ نکلا

ہم جس کے خریدار تھے وہ مال نہ نکلا

اُٹھ کر جو اُسے فتنہ محشر بھی اُٹھائے

ایسا تو کوئی آپ کا پامال نہ نکلا

اک آن میں خم زلف کا شانے نے نکالا

قسمت کا مری پیج کئی سال نہ نکلا

بیکار نہیں حُسن کے دریا میں تری زلف

بے صید لئے بحر سے یہ جال نہ نکلا

آئے تھے عیادت کے لیے غیر کو لے کر

پچھتائے وہ میرا جو برا حال نہ نکلا

ہم اخترِ تاباں سے شبِ وصل ملاتے

اُس روئے منور پہ کوئی خال نہ نکلا

ہم عشق کو سمجھے تھے کہ لڑکوں کا ہے اک کھیل

یہ کھیل تو بازیچۂ اطفال نہ نکلا

دل چوٹ جو کھاتا ہے تو رہتا نہیں ثابت

اس شیشہ میں جس وقت پڑا بال نہ نکلا

جو پیچ ازل کے ہوں نکلتے نہیں ہرگز

سیدھا تری زلفوں کا کوئی بال نہ نکلا

میں داورِ محشر سے یہ پوچھوں گا الٰہی

کیا کچھ بھی غلط نامۂ اعمال نہ نکلا

در پردہ عتاب آٹھ پہر ہم پہ ہوئے ہیں

پردے سے ترا چہرہ کبھی لال نہ نکلا

پُہنچا ہوں مجازی سے حقیقت کو بھی لیکن

کب عشق مری جان کا جنجال نہ نکلا

وہ اس لئے آئے تھے کہ ہم داغ کو لوٹیں

ہر چند ٹٹولا کئے، کچھ مال نہ نکلا

داغ دھلوی