Ghairun Say way Eisharay Hum Say Chupa Chupa kar Urdu Ghazal By mir taqi mir

غیروں سے وے اشارے ہم سے چھپا چھپا کر

پھر دیکھنا ادھر کو آنکھیں ملا ملا کر

ہر گام سد رہ تھی بتخانے کی محبت

کعبے تلک تو پہنچے لیکن خدا خدا کر

نخچیر گہ میں تجھ سے جو نیم کشتہ چھوٹا

حسرت نے اس کو آخر مارا لٹا لٹا کر

اک لطف کی نگہ بھی ہم نے نہ چاہی اس سے

رکھا ہمیں تو ان نے آنکھیں دکھا دکھا کر

ناصح مرے جنوں سے آگہ نہ تھا کہ ناحق

گودڑ کیا گریباں سارا سلا سلا کر

اک رنگ پاں ہی اس کا دل خوں کن جہاں ہے

پھبتا ہے اس کو کرنا باتیں چبا چبا کر

جوں شمع صبح گاہی یک بار بجھ گئے ہم

اس شعلہ خو نے ہم کو مارا جلا جلا کر

اس حرف ناشنو سے صحبت بگڑ ہی جا ہے

ہر چند لاتے ہیں ہم باتیں بنا بنا کر

میں منع میرؔ تجھ کو کرتا نہ تھا ہمیشہ

کھوئی نہ جان تو نے دل کو لگا لگا کر