Palkoon Pa Thay Parah e Jigar Rat Urdu Ghazal By Mir Taqi Mir

پلکوں پہ تھے پارۂ جگر رات

ہم آنکھوں میں لے گئے بسر رات

اک دن تو وفا بھی کرتے وعدہ

گذری ہے امیدوار ہر رات

مکھڑے سے اٹھائیں ان نے زلفیں

جانا بھی نہ ہم گئی کدھر رات

تو پاس نہیں ہوا تو روتے

رہ رہ گئی ہے پہر پہر رات

کیا دن تھے کہ خون تھا جگر میں

رو اٹھتے تھے بیٹھ دوپہر رات

واں تم تو بناتے ہی رہے زلف

عاشق کی بھی یاں گئی گذر رات

ساقی کے جو آنے کی خبر تھی

گذری ہمیں ساری بے خبر رات

کیا سوز جگر کہوں میں ہمدم

آیا جو سخن زبان پر رات

صحبت یہ رہی کہ شمع روئی

لے شام سے تا دم سحر رات

کھلتی ہے جب آنکھ شب کو تجھ بن

کٹتی نہیں آتی پھر نظر رات

دن وصل کا یوں کٹا کہے تو

کاٹی ہے جدائی کی مگر رات

کل تھی شب وصل اک ادا پر

اس کی گئے ہوتے ہم تو مر رات

جاگے تھے ہمارے بخت خفتہ

پہنچا تھا بہم وہ اپنے گھر رات

کرنے لگا پشت چشم نازک

سوتے سے اٹھا جو چونک کر رات 

تھی صبح جو منھ کو کھول دیتا

ہر چند کہ تب تھی اک پہر رات   

پر زلفوں میں منھ چھپا کے پوچھا

اب ہووے گی میرؔ کس قدر رات