"Har Marhala e Shooq Say Lahra K Guzar Ja"A Beautiful Urdu Ghazal By saghar Siddiqui

ہر مَرحلہ شوق سے لہرا کے گُزر جا

آثارِ تلاطم ہوں تو بَل کھا کے گُزر جا

بہکی ہوئی مخمور گھٹاؤں کی صَدا سُن

فردوس کی تدبیر کو بہلا کے گُزر جا

مایوس ہیں احساس سے اُلجھی ہوئی راہیں

پائل دِل مجبور کی چھنکا کے گُزر جا

یزدان و اہرمن کی حکایت کے بدلے

انساں کی روایات کو دُہرا کے گُزر جا

کہتی ہیں تجھے میکدہ وقت کی راہیں

بگڑی ہوئی تقدیر کو سُلجھا کے گُزر جا

بُجھتی ہی نہیں تشنگی دل کِسی صُورت

اے اَبرِ کرم آگ ہی برسا کے گُزر جا

کانٹے جو لگیں ہاتھ تو کچھ غم نہیں ساغرؔ

کلیوں کو ہر اِک گام پہ بِکھرا کے گزر جا