rudad muhabbat kia kahiya kuch yaad rahay kuch bhool gaya '' A beautiful urdu poetry by saghar siddiqui

روداد محبت کیا کہیے کچھ یاد رہے کچھ بھول گئے

دو دن کی مسرت کیا کہیے کچھ یاد رہی کچھ بھول گئے

جب جام دیا ساقی نے جب دور چلا محفل میں

وہ ہوش کی ساعت کیا کہیے کچھ یاد رہی کچھ بھول گئے

اب وقت کے نازک ہونٹوں پر کچھ مجروح ترنم رقصاں ہے

بیدار مشیت کیا کہیے کچھ یاد رہی کچھ بھول گئے

احساس کے میخانے میں کہاں اب فکرونظر کی قندیلیں

آلام کی شدت کیا کہیے کچھ یاد رہی کچھ بھول گئے

کچھ حال کے اندھے ساتھی تھے کچھ ماضی کے عیار سجن

احباب کی چاہت کیا کہیے کچھ یاد رہی کچھ بھول گئے

کانٹوں سے بھرا ہے دامن دل ، شبنم سے سلگتی ہیں پلکیں

پھولوں کی سخاوت کیا کہیے کچھ یاد رہی کچھ بھول گئے

اب اپنی حقیقت بھی ساغر بے ربط کہانی لگتی ہے

دنیا کی حقیقت کیا کہیے کچھ یاد رہی کچھ بھول گئے

ساغر صدیقی