na kashtiyoon ka na kinaroon ka ihtram karo '' A beautiful urdu ghazal by saghar siddiqui

نہ کشتیوں کا نہ کناروں کا احترام کرو

فقط بھنور کے اشاروں کا احترام کرو

یہیں سے گزرے گا ایک روز کاروان بہار

فسردہ راہگزاروں کا احترام کرو

جو ہو سکے تو بدل دو نوشتہ تقدیر

نہ ہو سکے تو ستاروں کا احترام کرو

خزاں کی گود میں بھی پھول مسکرا اٹھیں

کچھ اس طرح سے بہاروں کا احترام کرو

نشاط و کیف کی دنیا میں جھومنے والو

کبھی تو اجڑے دیاروں کا احترام کرو

یہی ہے ذوق عبادت کی انتہا ساغر

غم حیات کے ماروں کا احترام کرو

(ساغر صدیقی)